बाई आहे बाईच राहीन...

बाई आहे बाईच राहीन
           पुढचा जन्म बाईचा लेईन.
समजून घेईन मनाची जागा, 
           संवादाचा जोडीन सांधा.
गुंतत जातो गुंत्यांचा पुंजका, 
            हातात घेऊन 
            एक एक करीत सोडवत नेईन.
इच्छांच्या पिशवीला 
            वेळीच शिवीन बंद, 
            नकोत आता मला नात्यात निर्बंध.
बाई आहे बाईच राहीन.
संकटाचे पैंजण पायात घालीन,
            नाद त्यांचा ऐकत 
            तळव्यावर नाचवीन.
 बाई आहे बाईच राहीन. 
अन्यायाच्या फुलांचा  
            डोक्यात वर्षाव -
            लिखा समजून चिरडून टाकीन. 
बाई आहे बाईच राहीन. 
ढालीत मी स्वतःला बघेन. 
            वेळ आली की ढालच होईन.
बाई आहे बाईच राहीन.